የትምባሆ ሞኖፖል ለጃፓን ኩባንያ ተሸጠ (የፍኖተ ዴሞክራሲ ራድዮ አጫጭር ዜናዎች)

የግንቦት 19 ቀን 2008 ዓ.ም. ዜና (May 27, 2016 NEWS)

‪#የትምባሆ ሞኖፖል ለጃፓን ኩባንያ ተሸጠ

#የግብጽ አውሮፕላንን በመፈለግ ላይ የሚገኙት ባለሙያዎች በራዲዮ መገናኛ አንድ መሳሪያ አገኙ

#የእንግሊዝ የጦር መርከቦች ወደ ሊቢያ ሊላኩ ነው

#የጣሊያን ጠረፍ ጠባቂዎች ከ4000 በላይ ስደተኞችን አዳኑ

#በጊኒ ቢሳዎ የአገሪቱ ገዥ ፓርቲ አባላት በፕሬዚዳንቱ መኖሪያ ቤት የተቃውሞ ሰልፍ አደረጉ

 የኢትዮጵያ ሕዝብ ሀብትና ንብረት የሆኑትን መሸጥና መዝረፍ መለያ የሆነው የወያኔ አገዛዝ ከአጼ ኃይለስላሴ ዘመን ጀምሮ በሕዝብ ሀብትነት የተመዘገበውን የትንባሆ ሞኖፖል ለጃፓኑ ኩባንያ መሸጡ ታውቋል። ወያኔ የሽያጩን ውል በሚመልከት ከኩባንያው ጋር በቅርቡ አንድ ውል ይፈራረማል ተብሎ ይጠበቃል። የኢትዮጵያ ትምባሆ ሞኖፖልን ለመግዛት አንድ የእንግሊዝና የአሜሪካ ኩባንያ 230 ሚሊዮን ዶላር አቅርበው እንደበርም ታውቋል። ጄቲ የተባለው የጃፓን የትንባሆ ኩባንያ ግዥውን መፈጸሙን ሲገልጽ በአፍሪካና በመካከለኛ ሰፊ ገበያ እንዳለውም ተገልጿል። የወያኔ አገዛዝ አዲስ አበባን ከተቆጣጠረ ጀመሮ በሕዝብና በአገር ስር የነበሩ ንብረቶችን በመሸጥ የወያኔ መሪዎችን ያከበረ መሆኑ ይታወቃል።

 

ከጥቂት ቀናት በፊት ከፓሪስ ወደ ካይሮ በመብረር ላይ እንዳለ ባልታወቀ ምክንያት በሜዲትራኒያን ባህር የወደቀውን የግብጽ የመጓጓዣ አውሮፕላን ስብርባሪ በተለይም ድምጽን እና የሁኔታ መረጃዎችን የሚቀርጹትን መሳሪያዎች በመፈለግ ላይ የሚገኙት ባለሙያዎች አንድ ከአውሮፓላኑ ካቢን በስተርጅባ የሚገኝና አውሮፕላኑ ያለበትን ቦታ መረጃ አሰባስቦ የሚያስተላልፍ መሳሪያ በራዲዩ ግንኙነት ያገኙ ሲሆን ይህ መሳሪያ ከተገኘ ምናልባት በአውሮፕላኑ ውስጥ የሚሰሙ ድምጾችንና የሁኔታ መረጃዎችን የሚቀርጹት መሳሪያዎችም አብረው ሊገኙ ይችላሉ የሚል ተስፋ ከፍ ብሏል። የድምጽና የሁኔታ መረጃ መቅረጻዎች የሚቀመጡት በአውሮፓላኑ መጨረሻ ላይ ነው። የተገኘውን የራዲዮ መገናኛ መሰረት በማድረግ ፈላጊዎቹ በሚቀጥሉት ቀናት ጥልቅ በሆነው ውሃ ውስጥ ፍለጋቸውን አጠናክረው የሚያካሄዱ መሆናቸው ተገልጿል። 66 መንገደኞችንና የአውሮፕላን ሰራተኞችን አሳፍሮ ይጓዝ የነበረውና የግብጽ አየር መንገድ ንብረት የሆነው አውሮፕላን ለወደቀበት ምክንያት የተለያዩ ግምቶች ይሰጡ እንጅ የመውደቁ ምክንያት ይህ ነው የተሰጠ መደምደሚያ የለም ። አውሮፕላኑ ከራዳር ውጭ ከመሆኑ በፊት በመታጠቢያ ቤቱና በሌላው የአውሮፕላኑ ክፍል እሳት መነሳቱን የሚያሳይ መረጃ መሬት ላይ ባለ መሳሪያ ተመዝግቧል የሚል ዜና መሰራጨቱ ይታወሳል።

 የእንግሊዝ የጦር መርከቦች ወደ ሊቢያ የሚላኩ መሆናቸውን የእንግሊዙ ጠቅላይ ሚኒስትር ቶኪዮ ላይ ለተሰበሰበው የሰባቱ ሃብታም አገሮች የመሪዎች ስብሰባ ገልጸዋል። የጦር መርከቦች ከሊቢያ ወደ አውሮፓ የሚጎርፍ ስደተኞችን በመቆጣጠርና ህገ ወጥ አስተላላፊዎችን በመያዝ ስራ ላይ እንደሚሰማሩ እንዲሁም በዚህ በኩል እንግሊዝ ቀዳሚ ሚና እንደምትጫወት ገልጸዋል። ባለፈው ሳምንት የሊቢያ የአንድነት መንግስት ከአውሮፓ ህብረት ወታደራዊ እርዳታ የጠየቀ ምመሆኑ ሲታወቅ ከተጠየቁት እርዳታ ውስጥ የሊቢያን የጠረፍ ጠባቂዎች በወታደራዊ ትምህርት ማሰልጠንና ስደተኞችን በመቆጣጠር በኩል ሊጠቅሙ የሚችሉ ወታደራዊ መሳሪዎችን የሚጨምር መሆኑ ይታወሳል።

 በተያያዘ ዜና ሐሙስ ግንቦት 18 ቀን 2008 ዓም የጣሊያን ጠረፍ ጠባቂዎችና ሌሎች ከ4000 በላይ ስደተኞች ከሞት አደጋ ያዳኑ መሆናቸው ሲገለጽ ከሊቢያ ጠረፍ አጠገብ ሁለት ጀልባዎች በመግልበጣቸው ከ100 በላይ የሚሆኑ ስደተኞች በባህር ውስጥ ሳይሰጡ አይቀርም የሚል ግምት ተወስዷል።

 የጊኒ ቢሳዎ ፕሬዚዳንት ሕገ መንግስቱ ከሚፈቅድላቸው ውጭ የአገሪቱን ጠቅላይ ሚኒስትር በመሾማቸው የአገሪቱ ገዥ ፓርቲ ደጋፊዎች በፕሬዚዳንቱ መኖሪያ ቤተ መንግስት አካባቢ ተቃውሞ ሰልፍ አካሂደው ጥቃት የፈጸሙ መሆናቸው ተዘግቧል። በሕገ መንግስቱ መሰረት ገዥው ፓርቲ ጠቅላይ ሚኒስትሩን መሰየም ሲገባው የፓርቲው አባል የሆኑት የአገሪቱ ፕሬዚዳንት በማን አለብኝነት ጠቅላይ ሚኒስትሩን ሾመው በስራ ማስቀመጣቸው ከፓርቲው ባለስልጣኖች ጋር ቅራኔ ውስጥ የጨመራቸው መሆኑ ታውቋል። ሐሙስ ግንቦት 18 ቀን 2008 በመቶ የሚቆጠሩ የገዥው ፓርቲ ደጋፊዎች ቤበተ መንግስቱ ላይ ድንጋይ በመወረወና የላቲክ ጎማዎችን በማቃጠል ተቃውሟቸው የገለጹ መሆናችው ተነግሯል።