በአንዋር መስጊድ ብጥብጥ ታስረው የነበሩ ተጠርጣሪዎች በሙሉ በዋስ ተፈቱ

-ተጐጂዎች ከሆስፒታል ቢወጡም በደንብ እንዳልዳኑ ተገልጿል

በአንዋር መስጊድ ብጥብጥ በፖሊስ አባላትና በተወሰኑ ሰዎች ላይ ደርሷል በተባለ ከባድና ቀላል ጉዳት ለአንድ ወር ያህል ታስረው የከረሙ ሁሉም ተጠርጣሪዎች እያንዳንዳቸው የአምስት ሺሕ ብር ዋስ በማስያዝ እንዲፈቱ ትዕዛዝ ተሰጠ፡፡

ሐምሌ 11 ቀን 2006 ዓ.ም. በዕለተ ዓርብ በጁምአ ፀሎት ላይ በተነሳ ብጥብጥ፣ በብዙ መቶዎች የሚቆጠሩ ተጠርጣሪዎች በፀጥታ ኃይሎች በቁጥጥር ሥር መዋላቸው ይታወሳል፡፡ በወቅቱ በነበረው ብጥብጥ ሰላም ለማስከበር በተሰማሩ የፖሊስ አባላት ላይ ከፍተኛ ጉዳት መድረሱንና በተለይ ሁለት ፖሊሶች ኮማ ውስጥ መግባታቸው በአዲስ አበባ ፖሊስ ኮሚሽን መርማሪ ፖሊሶች ሲገለጽ ከርሟል፡፡

በጥርጣሬ የተያዙት በብዙ መቶዎች የሚቆጠሩ ታሳሪዎች በየክፍላተ ከተሞቹ በተቋቋሙ ጊዜያዊ ፍርድ ቤቶች የወንጀል ተሳትፏቸውን በማጣራት የተለቀቁ ሲሆን፣ 24 ተጠርጣሪዎች በፖሊስ ኮሚሽን ሥር ሆነው ጊዜ ቀጠሮ እየተጠየቀባቸው በእስር ላይ ቆይተዋል፡፡ እስካለፈው ሳምንት ድረስ አራት ተጠርጣሪ የፖሊስ አባላትን ጨምሮ 18 ተጠርጣሪዎች በመታወቂያ ዋስትናና በአምስት አምስት ሺሕ ብር ዋስ ተለቀዋል፡፡ ቀሪዎቹ ስድስት ተጠርጣሪዎችም ነሐሴ 12 ቀን 2006 ዓ.ም. እያንዳንዳቸው የአምስት ሺሕ ብር ዋስ እያስያዙ እንዲፈቱ፣ የአዲስ አበባ ከተማ ነክ ሰበር ሰሚ ፍርድ ቤት ትዕዛዝ ሰጥቷል፡፡

መርማሪ ፖሊስ ግን ጉዳት የደረሰባቸው የፖሊስ አባላትና ግለሰቦች ከሆስፒታል የወጡ ቢሆንም፣ ሙሉ በሙሉ አለመዳናቸውን በመግለጽ የሰባት ቀናት ተጨማሪ ጊዜ እንዲሰጠው ቢጠይቅም ፍርድ ቤቱ አልተቀበለውም፡፡